Termurmur me gelar kuta enda perban jelma na mejingkat kal kerina. Perbapan ras pernanden ersada kal arihna lampas ku juma, ben kal maka kurumah. Ikuanken kalak me anak kuta enda lanai ngidah ikur babi. Perban lampasna lawes ku juma langa idah ikur babi ras ben maka mulih kurumah, babi inggo ku karang jadi lanai idah perban enggo sehkal benna. Anakna lit empat kalah enggo sekolah kerina. Keempat anakna enda sekolah i Medan, perban sekolah si meganjang lanai lit i kuta. E maka mbue me tiap bulan man kirimen belanja anak e. Perban sade maka bapa ras nande e harus mejingkat erdahin, sabap kiremen e lanai bo banci ngelah-ngelak, seh tanggalna harus enggo i kirimken ku Medan. Tapi, keempat anakna e tutus kal atena sekolah labo ia nggit erjagar-jagar gia lit waktu luang. Padin akapna erlajar i rumahna inganna tading e. Nilai entah pe pontenna mejile kerina asilna tiap semester. E maka bicara melala pe keri orang tuana enda meriah nge ukurna, labo akap na latih erdahin e, ndarami duit e, bicara sekali-kali ngemo ka ia kujuma kalak. Gelah lit duit man berenken man anakna.

Nandangi kerja tahun tenahkenna me anakna enda empatna gelah reh ku kuta, sabap bage kin biasana ibas kuta enda, adi kerja tahun i tenahken kade-kade sindauh ras si ndeher. Keempat anakna enda pe reh me ku kuta; enca seh ia i kuta itatapna jabu labo bagi i kota, e maka anakna e mis muat bagin guna pesikap jabu orang tuana. Sekalak nuci uis si enggo melala melket, lalit banna si tading cucina kerina, deba napui rumah, ngelah kaca jendela, deba nuci piring, kudin belanja si enggo seh kal biringna. Cuan, cangkul raga bage pe pompa i susunna ibas sada ingan e maka kerina enggo mejelis ras mehuli.

Bagendam ibas kuta enda adi reh kerja tahun pulung me anak-anak kerina bage pe kade-kade, janah rumah isina pe bersih kerina. E maka ibas mata kerja tahun enterem reh kade-kade janah meriah ukur anak bage pe kade-kade si itenahken. Man entabeh bage pe lit ka ban pangan-pangan e me kap rires, tape, bage pe cimpa, ibereken, pan kade-kade si reh ku rumah, ras pe bereken ka deba man luah mulih kukutana. Bagendam setiap tahun.

Sumber: Sinalsal - Dra. Kartini Bangun, M.Hum.

Tanggal hari ini:
Dikelola oleh:
Dinas Komunikasi dan Informatika Kabupaten Karo
Jalan Djamin Ginting Nomor 17 Kabanjahe Sumatera Utara