Beluh kal nuduh-nuduhi bagi cikua
Tempa beluh ia randing-andingen
La gunana la meriah ras orang tua
Sabap bas orang tua dem kekelengen

Erdalan kam ku namo tating
Erdalan ras ningen erkanting
Adi ngerana kam rusur randing-anding
Adi erdahin rusur kam tading

Nurung kaperas i lau suah
Cekala turah i tengah reba
Ngerana harus kita terbeluh
Gelah metunggung idah nande bapa

Kudin pernaken mbiring rupana
Bunga ncole mbentar rupana
Danak-danak mehuli ngerana
Malem kel pusuh nande bapana

Wari Senin tiga kabanjahe
Wari Sabtu kita engkahe
Adi metuda la kalak mehangke
Adi mehamat enterem kade-kade

 

Berastagi ku Bandar Baru
Sarinembah ku nuan buluh
Ersentabi aku man bandu
Rikut nembah jari sepuluh

Bereng-bereng kudibah
Lada jera gula batuna
Enterem jelma kuidah
Sada kena nomor satuna

Pola pia persabah lautengguli
Cuan kujuma cuan kencamet
Ula tersia totota simehuli
Uga nisura bage nidapet

Gundera salah gundera
Buluh belin kubenturi
Kutera kalak kutera
Beltekku mbelin kubesuri

Cimen simolah-molah
Palu-palu si kuta buluh
Adi enggo kita sekolah
Mela malu kita la beluh

 

 

.....

 

Sumber: Sinalsal - Dra. Kartini Bangun, M.Hum.

 

---- Tanggal hari ini: ----
Dikelola oleh:
Dinas Komunikasi dan Informatika Kabupaten Karo
Jalan Djamin Ginting Nomor 17 Kabanjahe Sumatera Utara