Mbarenda kalak karo adi seh sura-surana ngataken bujur man si mada tinuang erbahan erpangir ku lau, bage pe adi lit ka nipi jahat entah pe nipi gulut enda pe iban ka nge erpangir ku lau nangtangi singalah-ngalah. Ingan erpangir ku lau e, lit ku lau Maler entah pe lit ka ku lau Debuk-debuk, lau Melas janah bau kertah. Sabap i bas lau Debuk-debuk e iyakini lit je pengianna e me kap nini beru kertah ernala, adi ertoto ije maka kai sini pindoken banci bereken nini beru kertah ernala e. Enterem nge mbarenda rusur jelma ertoto i je labo kalak karo ngenca tapi lit kang si deban selain kalak Karo.

Si ertoto ku lau debuk-debuk e babana me persembahenna man nini beru kerta ernala e e me kap, galuh si emas entah piga-piga cikat, rimo entebu, lau penguras, lit kadeba, nakan megersing, manuk mbulan, ras si debanna. Endam me ibahan persembahen man nini beru kertah ernala icibalken me i bas si enggo isediaken gelgelnari.          

I bas erpangir e lit nge deba ndilo guru sibaso e me kap guru si mesiting tapi lit kang labo ndilo guru. Sekedar ridi ras erpangir nangtangi singalah-ngalah saja. Tapi adi ndilo guru sibaso enda biasana enggo dahin si galang, sabap i jenda itenahken nge kuh sangkep nggeluh i bas peradaten nggeluh.

Lit me sada keluarga e me kap keluarga bapa Teger lit me nipi jahat ras nipi gulut bas ia, janah lit ka kejadien sila bagi ukurna. E maka ibahanna me dahin erpangir ku lau i  bas bulan meganjang. Itenahken me kade-kade sindauh ras sindeher gelah ras-ras pulung guna erpangir ku lau Debuk-debuk, gelah kal nangtang singalah-ngalah ras nise kal pe kari nipi gulut, nangtangi mara kelesa, gancih utang jadi ido ras gelah sai mara ku rumah tendi.           

Kenca dung erpangir i lau debuk-debuk e ridi me kerina ku bas lau e, lau na ije melas janah bauna bau kertah. Igusgusi me daging alu rimo pangir e, janah icurcuri ka takal alu lau penguras, gelah tuhu-tuhu enggo mejelis kal kerina daging e bage pe enggo ka ndabuh kerina dunut-dunut daging. Enca enggo dung ridi ras erpangir maka mulih me ku rumah.           

Seh kenca i rumah enggo ka lit ibahan gendang keteng-keteng ngalo-ngalo si ikut erpangir ku lau debuk-debuk. E maka seh kenca i rumah maka landek me kalak enda kerina, janah ngalo-ngalo me anak beru.           

I bas paksa kalak enda landek lit ka pe deba seluken, lompat-lompat ia alu gegehna si luar biasa, la bagi biasana, i jenda i dah guru sibaso e me ise kin gegehna si luar biasa, la bagi biasana, ijenda i dah guru sibaso e me ise kin siniari ia e. E maka ngerana ia kai kin atena, janah engkai maka ia reh. I jenda guru sibaso e ngenca ngangkaisa , kai sura-sura si seluken e. E maka reh me nina guru sibaso banci nge beresken kami pemindondu, tapi berekenndu lah dage lebe rejekina si simpar ras kesehaten man peninggerenndu e, gelah kai sura-surandu banci mis bahan kami aku pagi saksina nina guru sibaso.

Enca enggo dung landek, bage pe man cimpa ras lau penguras enggo isikapken maka enggo mulih me si niari peninggeren e, maka ibahan me acara man. Enca elah man e maka ban ka acara ngerana-ngerana, janah dahin e dung karaben.

 Sumber: Sinalsal - Dra. Kartini Bangun, M.Hum.

Tanggal hari ini:
Dikelola oleh:
Dinas Komunikasi dan Informatika Kabupaten Karo
Jalan Djamin Ginting Nomor 17 Kabanjahe Sumatera Utara