Njujungi beras piher, enda sada acara si iban man sekalak entah sekeluarga ngataken bujur man Dibata perban enggo mulihi sehat, entah pe perban banci terhindari ibas mara bahaya nari.

Lit pe pulungenna erbahan dahin njujungi beras piher e. E me kap:

  1. Beras si tunggung, ertina gelah metunggung, mehuli
  2. Lada, ertina gelah ersada kata, ersada arih.
  3. Sira.ertina gelah masin kata nibelas.
  4. Ulis arinteneng, ertina galah tenang tendi i rumah
  5. Tumba tempu kuling-kuling, ertina tanda sengkep nggeluh.
  6. Tinaruh raja mulia, ertina gelah tetap ermulia
  7. Belo bujur, ertina persembahen man tuhan simada kuasa

Kerja njujungi beras piher e situhuna labo bas kalak karo ngenca lit tapi bas suku-suku si deban pe lit misalna tepung tawar, pir si tendi ras si debanna. Budaya si bagenda rupana seh ngata gundari i jaga alu mehuli. Acara njujung beras piher enda biasana kalimbubu si njujungi beras piher e man anak beruna.

Itamaken kalimbubu me beras piher entah pe beras situnggung e ibas buk anak beruna.Itamana beras situnggung e ku bas takal nina, sada ninta Dibata kasi-kasi, ersada kerina arih anak beruna kami ras anak beru menterina, bage pe ku seninana kerina bage pe ku kami kalimbubuna ula sirubat-rubat.

Dua ninta dinata kasi-kasi ula erdua kata. Telu ninta Dibata kasi-kasi, selpatken kerina sila mehuli ibas jabu. Empat nina Dibata kasi-kasi, selpatken banga kelesa anak beru kami enda kerina bali ninta Dibata kasi-kasi ertima kerna tendinta i rumah. Enem ninta Dibata kasi-kasi teldem kerina sila mehuli ras gerek-gerek sila mehuli. Pitu ninta Dibata kasi-kasi pitut kerina banga kelesa anak beru kami seh pe ku anak beru menteri senina bage pe ras kalimbubu kerina nandangi kalimbubu ras anak beruna, bage pe man jelma sinterem enda. Siwahi ninta dibata kasi-kasi nilahi kerina sila mehuli. Sepuluh ninta Dibata ninta Dibata kasi-kasi bunuh kerina sila mehuli bunuh kerina ukur kalak la mehuli ibas kuta enda. Sepuluh sada ninta Dibata kasi-kasi ersada kerina tendinta i rumah.

Dage bagem anak beru kami sibar-sibar bagem me labe ngenca mangmang ibas njujungi beras peradaten kalak karo merga silima rakut si telu tutur si waluh bagem cakapku man bandu mejuah-juah kita kerina. Mejuah-juah

Sumber: Sinalsal - Dra. Kartini Bangun, M.Hum.

---- Tanggal hari ini: ----
Dikelola oleh:
Dinas Komunikasi dan Informatika Kabupaten Karo
Jalan Djamin Ginting Nomor 17 Kabanjahe Sumatera Utara